" ژن باوگ " --- نویسەر : وەحید کەماڵی

نادر  وەختێ  هاتە  دنیا  ، داڵگێ  دە  سەرێ  چگ  و  ئەمرێ  خودا  کرد . دویمای  مردنێ  داڵگێ   باوگێ  ژە  ناهەڵاجی  نادر  دا  دەسێ   دایە  تا  ئێوەتێ   بکەی . رۆژگار   چگە سەر  و  باوگێ  نادر  ژنێ  تر خواست .نادر  هێمان   بویچگ  بی  کە   کەفتە  ژێر  دەسێ  باوەژن ، باوەژن  دە  ئەوەڵەو  وەردێ  خاس  بی  و  ئەڕای  یە  کە  دە لای  باوگێ  نادر  خوەی   وە  ژنێ  خاسێ  نیشان  بێ  قایم  دگەردیە  دەورێ  نادر  و  چەن  ساڵێ   وەیجوورە  چگەوسەر.

دویمای  دوساڵ  ژن باوگێ  نادر  زگێ  پڕ  بی  و  کوڕێ  هاورد و  نامێ  نانە  مێرزا ، وە هاتنێ  مێرزا  دی  نادر  دە  چیەم  کەفتی و  رۆژ  وە  رۆژ  بێکەس ترەو   دوویی و  دی  هیچ  قوربێ  ناشت . باوگێ نادریش  کە دی  دە ژنە  دویەمەی  کوڕێ  داشت و  وە  هزار  بەدبەختی  ژیانێ  نایە یەکەو  دی  فرە  هویرێ  وە نادر  نەوی  و  فرەتر  لایەنی َ  ژنەی  دگرت  تا  نادر .

رۆژگار  وە سەختی  و  وە تیەڵی  ئەڕای  نادر  دچگەوسەر و نادر  وە  تەمەنێ   ڕەسی  کە باسە  دەرزنێ  کوتان (شەلی)  ئەڕای  بیان . باوەژنەیشی  کە دی  خاس  جیێ خوەی  گرتی و  خەیاڵێ  دە باوەت  هەمە چشت  راحەت  بی  دەلای  خوەی  دووت   هەرچگە بوو  نادر  دە  ژنێ   ترە  و  خوەم  کوڕێ  دێرم  و  باسە  کارێ  بکەم  کە  نادر  دەس  نەنێگە  بانێ  میراتێ  باوگێ  و  وە  هەر  فەنێ  بیە  باسە سەڕێ  بتەڵەفنم  ، یە بی  هەگێ  گەیێ  دەرزن کوتانێ  نادر هات  باوە ژنەی  نەوردەی  ئەڕای  کوتان و نادرێ  فەقیریش  دە  تەمەنێ  نەوی  کە  چشتێ بزانێ  و  وەیجوورە  بی  کە  دویمای  چەن مانگێ  شەلەو  بی . باوگێیش  وەختێ  دە  ماجەرا   ئاوڕەسی  کە دی  هیچ  کارێ  ژە دەسێ  نیات ، ئەمان  نیەزانست  کە  باوەژنێ  نادر  دە قەسی   ئی کارە  کردگە .

رۆژ و مانگ و ساڵ  وە دەمێ   یەکەو  دیاتن و  دچگن  و نادر و مێرزا   هەردگیان  گەپەو   بین  ئەڵبەت  مێرزا  وە نازاری  و خوەشی   و  نادر  وە  مەینەت  و  چارەڕەشی .مێرزا  دچگە  مەدرەسە و  چەن ڕەنگ  کەرواس  و  کەوش و  شواڵ  دکردە  وەر   و  نادرێ   بەسەزوانیش  وە  کەرواس  و  شواڵێ   شڕێ   وە   زوورێ   دەس  خوەی   پەلکیش   دکردە   بانێ   خاک و خۆڵ  و  دە  وەختێ  چاشت  خواردن  چەپاڵێ  نانێ  هشک  و  پاشمەنەی  چشتێ  دیانەی  تا بخوەی .

ڕۆژگار  وەی  جورە  دچگە سەر  و  تا  یەی  ڕۆژ  مێرزا  وەردێ  یەی  نەفەر  بی  وە شەڕ  و مرافەی  و  کابرایش  وە زوور  بی  ، کابرا  مێرزا  دایە  زەمین و چنگ  نایە  قوڕگێ  و دخواس  بتاسنێگەی  تا یەی جارەکی  بمرێ . چەن کەسێگیش  دەوریان  گرتین  و  هە  دنووڕسن  و  قەشمەری   وە  مێرزا  دکردن . کەسیش نامجیان  نییەکرد.

دە ناکام  دەنگێ   ئەڵسا  و  ئایمەیلە  چگنەو لا  ... !

بەڵێ   نادر بی ... !

نادر  وە کڕمەکیش  خوەی  ڕەسانە  شەڕکەرەیل  و  دە  پشتەو  قولێ  کابرا  گرت  و  پێچێ  دا  ، کابرایش  سەنگەلا  بی  و  وە لاو  کوتریا  زەمین ، مێرزایش  ئەڵساو  وە  کومەکێ  نادر  خاس  کابرا  کوتان  و  یارویش  دەرچگ و فەرار  کرد .

هەگێ  قاڵ خەفیا  مەردمە  دین  ژنێ  تەک  داگەسە  قەی  دیوارێ  و دێرێ  گریوێ  و  نووڕێ   خوەی   کەی ...!

تومەس  هەگێ  نادر  وە  وەرێ  گیان  وە  فریای   مێرزا  ڕەسێ  ، ژن باوگێ   ها وە  چیەمەو  و  گشتێ  ماجەرا  دینێ .

مەردمە  دە  ژن  پرسین  چەتە؟ چە بییە ؟  ئەڕا  چە  گیرویی و  نووڕێ  خوەت  کەیت ؟!

ژنیش  دە  داخێ  دڵێ   داستانێ  کاروساتێ  کە وە سەرێ  نادر  هاوردی  ئەڕایان باس  کردو   وت :

خودا چوی  بوەخشێگم ؟ چوی  برای  هامپشتێ  کوڕەم  بێچارە  کردم ؟!  و  دەم و ریێ خوەی  دڕنی ...

مەردمە و  نادر  و مێرزا  ئەسرێ  چییەمیان  ڕێ  گرتی  و  هیچکە  هیچ  نیەوت ...  !

کوتایی

وشەکان

-           ژن باوگ : باوە ژن ، ژنی باب

-           دەرزن : دەرزی ، سوزەن

-           گەی : کات ، وەخت ، نورە ، زەمان

-           ئەڵبەت :  هەڵبەت ، هەڵبەتە

-           نووڕ :  نفرین