کوردێ لوڕیم
مرکزی برای احیای هویت راستینکوردێ لوڕیم
مرکزی برای احیای هویت راستین"مەردی و نامەردی" نویسەر : وەحید کەمالی
بای تەپ و توز وەردێ خوەی وەیلا و واولا دوورد ، خوەر هاتیە نامڕاسێ ئاسمان و هەرچگە گوڵ و گیا بین ژە زوورێ تاوێ خوەر سیسکیاین .
سووراو ئێقەرە رێ کردی ئاز ژە هێژدنگەیلێ نەمای ، ژێرێ قولێ پوفلەک و بڵۆق دای . رێێ فرییەی هاتی ، تووشگێ نامێ ڕێیش ئەڕای نەمای و دە ورسگی وەرێ چیەمەیلێ تیەریکەو دوی . ورسگی و تیەنگی زوور ژەی سەنین و دی هەرنگ ژە دلێ نەمای .قەیرێ فرییەی چیەم گل دا تا هادەی دەوارێ ، رێوارێ یا کەسێ بینێ ئەمان بێرژە هەڵەت و تاوێ خوەر و چەن گلە تنگس چشتێ تر دیار نەی . تنگسێ ژە کەشێ رێیە دی ، ژە ناهەڵاجی پەلامارێ سای تنگس برد و دە سای ئەڵاژیا و چیەم بەسی . ئوقەرە شەکەت بی نیەتەنس چیەم واز بکەی ، رێێ فرییەی دە نوا داشت و هێمان سێ یەکێ رێ نەوڕی . هە دە ویرێ باقی رێیە بی و دە لای خوەی دووت وە بێ نان و ئاو چوی تویەنی ئی هەمگەی رێیە بووەیگەو سەر ؟! هە دەی خەیاڵاتە بی دە ناکام دەنگێ هاتە گوێیەی ، جگێ گورجێ خوەی کرد و ئەڵسا پا و وەر کردە دویما ...
تەنیا سوارێ دە دویرەو دیار دکرد ، سوار هە نزیکترەو دوی ... سووراو خوەی کیشا تا نامجای ڕێیە و هەگێ سوار هاتە نزیکێ دە وەراوەرێ وسا و ژە ئەسب هاتە خوار و وە سووراو سڵام کرد، سووراویش جواوێ دا.
سوار خاس ئێسفای سووراو گرت و نوورس شەکەتی دە سەر و کەپوڵێ وارێ ! وت : چنە دیارە فرە مێیەنگ و شەکەتی ؟! دیارە رێێ فرەی هاتیەو مەینەتێ فرییەی کیشایتە !
سووراو وت : ئاولا براگەم ، ڕاس بخوازی ژە وەشتێ دریژی ڕێ و ورسگی و تیەنگی ئاز دە گیانم نەماگە و تونیش چمان ژە جانبێ خودا نازڵ بیتە ئەڕام ، بڕەس وە هانام... !
سوار ک کوڕە جوانەی ئەڵیەک کەفتگێ بی ، وە خوڵقێ خوەش دەس کردە نامێ هەگبەی پشتێ ئەسب و جگێ نان و تووف و کونیلگێ ئاوێ دراورد و وە سووراو وت بچیم ژە سای ئەو تنگسە بنیشیم .
هەردگیان وە یەکەو هاتن نیشتن و سوار وە سووراو وت : تو نانەت بخوە تا منیش ئاوێ چایێ بنمە بان . سووراویش وە هەڵەپڵە دەس کردە خواردن و هەگێ تێر خوارد و هرووفێ نیشت دەس کردە دەمتەقە وەردێ سوار ک نامێ کاوە بی .
دویمای کەمێ وەختێ کاوە دی سووراو گیان گرتگە و گڕوگورجەو بیە وە سووراو وت : کاکە تا شەو نەگرتگەسەمان بیلا بکەفیمنە ڕێ ، سووراو وت : نامێ خودا باریمن ...بارەیل ئەڵوەسین و ئامادەی چگن بین ، کاوە ک ژە سووراو جوانتر بی و دخواس خزمەتێ فرەترێ وە سووراو بکەی ، وت : کاکە سووراو تو فرە وە پاپیا هاتیەو شەکەتی ، تو سوار بوو منیش وە پاپیا دیام .
سووراو ئەوەڵ کەمێ مکیس کرد ئەمان دماخر وە قسیەی کاوە کرد و سوارێ ئەسب بی، هەگێ قەیرێ دە ڕێیە بڕین ژەناکام شەیتان چگە پووسێ سووراو...! دەلای خوەی وت : ئەر وە جوورێ ئی ئەسبە بدزم هەم باقی ڕێیە وە سوارە چم و هەم ئەسبە بەم ئەڕای خوەم ....
کاوە ژە فکرێ سووراو بێ خەوەر بی و نیەزانس سووراو ها ویرێ دزینێ ئەسبەی ، سووراو جگ جگ ئەسبە تونتر دڕانی و خوەی کەمێ ژە کاوە خستە نواتر ، کاوە دەلای خوەی فکر دکرد چوین سووراو ئەڕای ئەسبەی خەریوە یەسە ئەسبە نیەمەزرێ و ڕەم کەی ، ئەڕای یە هیچ دەنگ نەکرد .سووراو هەگێ نووڕس نامنیێ وەردێ کاوە فرە بیە دەناکام نقیزەی ئەسب دا و ئەسبیش وە چوارقاو تووز کرد و دەرچگ . ژە کاوە نەزەرا ئەسب ڕەم کردگە و سووراویش نویەتەنێ گلێ بێ ... !
کاوە چڕی وە سووراو و وت : چەن جار دەس بارە ڕی ملێ خوەی وسێ ...سووراو وەر وە دویما نەکرد و وە چوارقاو ئەسب دوورد .
کاوە بڵاجەی مەنی و نیەزانست ماجەرا چەس...! وەختێ دە کردارێ سووراو ئاوڕەسی دی دێر بی و هیچ ژە دەسێ نیات ، کەمێ نوورس وە ئاسمان و دوارە وەر کردە سووراو و دە قوڕنێ دڵ هاوار کرد و وت :
" ئەسب و داراییەم وە نووشێ گیانت بوو ئەمان چشتێ ژەت خوازم ...! باسێ ئی ماجەرا دەلای کەس نەکەی و نەیشیتەی ، نەوە نامەردی بووە ڕەسم و ڕسیم و دی کەس وە فریای کەس نەکەفێ " . یە بەخت و تێوڵێ من بی و ئەو کەسە من ڕەسانە هانای تو ، نیەیلێ وەی بیاوانە بێکەس و بێ فریاڕەس بمینم و هەردگ دەسێ بردە ئاسمان و وت :
خودایا خوەت زانی دو کار ژە دو کەس نیای , " نامەردی ژە مەرد و مەردی ژە نامەرد " ، پەنای منیش وە خوەت .
کۆتایی
وشەکان
پوفڵەک : بڵۆق
هەرنگ : هێز ، توانا
تنگس : بنجکی گەورە
وەشت : قورسایی ، زۆربوون
هرووف : عەتەش
