"شەیدایی"

نیەزانی چەنێ دڵم ها هووڵت

داخێ گرانم پەی جێگای چووڵت

نیەزانی چەنێ گرفتارتم

ئەسیرێ گوناو نەقشێ خاڵتم

نیەزانی چەنێ ئاگر ها دڵم

دەردێ بێ دەرمان خسی وە کڵم

نیەزانی مرواری دیدەیلێ مەست

چە هاورد وە سەرێ یارێ بێ کەست

چووزانی دڵم ها دە چە حاڵێ

ئەڤداڵەو بییە پەی ماچێ خاڵێ

نیەزانی دڵم چەن بارگرانە

سەرگەشتەو شەیداو مەجنوون ڕەوانە

چووزانی دڵم نە ڕۆژ و نە شەو

نەیشتگە ئەرام نە ئارام نە خەو

تو شەیدای منی منیش شەیداتم

تو خاکێ منی من خاکێ پاتم

لێوت تەڕ بکە وە گوفتارێ دڵ

پاک بکە دڵم  دە  تووز و دە  خۆڵ

سەر بنە وە بانێ قبڵەگای دڵم

دڵت بار بنە وە پەنای دڵم

نەفەسم درار دە نەفەسگاهم

مەسیرم کەج کە دە قبڵەگاهم

بنووش دە شەراوێ جاری دە ڕەگم

بوەرەم وە پەرتگاو کوشنگەی مەرگم

بکەرەم وە نەزر و قوربانی چیەمت

تێرئاوم بکە دە کیەنی دەمت

تاگەر بزانن خەڵێ زەمانە

من شەیدا بیمە و ئاخر زەمانە.

.

وحید کمالی

16-4-2019

سلیمانیه