" قەسەم وە نێگات "

وە نازێ سووسەن ، وە ڕەقسێ لاڵە

واو پەڕەێ لێوە ، لەژێر ئەو خاڵە

وە نازێ نێگات ، واو چاوێ کاڵە

واو برۆی کەوان ، واو خەت و خاڵە

قەسەم وە نێگات ژیانم تاڵە

وە سەروێ نازێ باڵای شیرینت

واو لەش و لار و شێوەی ڕەنگینت

وە تیرێ موژگانێ ئاغشتەی خوینت

وە گەرمی عێشق و مەزهەب و دینت

قەسەم وە نێگات ژیانم تاڵە

وە شەوگارێ تاریکێ زوڵفەگەی خامت

قەسەم واو لەحزەی کەفتم وە دامت

وە تەختێ سینە و زنجەگەی چاڵت

وە وەقتێ گریان لە بانێ باڵت

قەسەم وە نێگات ژیانم تاڵە

واو زەردەخەنەی نیشێ وە لێوت

وە عەتر و عەبیر و وە بووێ سێوت

وە کەلامێ ناب و غەمزەی پەشێوت

وە مانگێ ڕوخسار، وە  زێڕ و زیوت

قەسەم وە نێگات ژیانم تاڵە

وە  زەخم و دەردێ ها لە دەروونت

وە ئاهێ سەردێ کیشم لە شوونت

بیمە ئاسارەی چەرخێ گەردوونت

تو لەیلی دەوران منیش مەجنوونت

قەسەم وە نێگات ژیانم تاڵە

حەسرەت و خەفەت هامدەمێ دڵم

لە شەیدایی تو وێنەی بولبوڵم

وێنەی پەروانە سەرگەشتەی گوڵم

لە حزوورێ تو شەمعێ مەحفڵم

قەسەم وە نێگات ژیانم تاڵە

وە شکۆهێ تو، وە فەقیری من

وە بێ مەیلی تو، وە پڕ مەیلی من

وە غورورێ تو ، وە حەقیری من

وە ئەیووبی تو ، وە بێ سەبری من

قەسەم وە نێگات ژیانم تاڵە

وە عێشقێ فەرهاد ، وە نازێ لەیلی

وە مەکرێ خسرەو ، وە شەرمێ شیرین

وە عەبد و مەعبوود ، وە خڵقەت و دین

وە زەخمێ سینەی کوێیەی بێستین

قەسەم وە نێگات ژیانم تاڵە

وە حورمەتێ عێشق ، وە پاکیێ دڵ

نەزەر وە وەقتێ چیمە ژێرێ گڵ

وە چەرخێ گەردوون ، وە سێحر و ئەفسوون

بیە کامێ دڵ ، نەپرس چین و چوون

قەسەم وە نێگات ژیانم تاڵە

.

وەحید کەمالی

١٨-٤-٢٠١٩

سلێمانیە