" لەزەتێ گیان دان "

دویەشەو دوارە هاتی وە خاوم

نەقشت نیشت وە ڕوی پەیکێ شەراوم 

گونای گوڵناریت کردی نەمایان

تەک دایت وە عەرشێ خودای خودایان

زوڵفێ چین چینت کردی پەریشان

ئاگر دای وە ماڵ و وە میلکانێ خان

تیرێ بژانگت نایتە ناو کەوان

دڵەگەی خەستەم کردی وە نیشان

وە سامێ چیەمت تەکان لێم بڕیت

وە ماچێ لێوت پەردەی دڵ دڕیت

بیتە نەچیروەن و منیش نەچیرت

ئامادەم کردی پەی نووشێ تیرت

چوی کەڵێ پیرێ ، دەرمەنەی دەوران

هووش و حەواسێ پەرت و پەریشان

خوەی هاتی وە پیری قوربانگای ژیان

لە ئاسۆت وسام تاگەر درای گیان

وەختێ زانسی دی شکارتم

زانسی شەیدای حەڵقەی دارتم

وەختێ زانسی تەسلیمت بیمە

چارەنویسێ عشق وە گیان خڕیمە

ئەڕای فرە بوو ئازارێ مەرگم

پارەتر بکەی خەنجەرت جەرگم

بچوو وە ئافاق هاوارێ دەردم

نەرای لە سینە هەناسەی سەردم

ئەڕای بکوشی عەتەشی چاوت

هەراسانتر بوو نەچیرێ داوت

ڕوح و بەدەنم لەیەک جیا کەی

قەتڵێ ڕوح و لەش سەوا سەوا کەی

سینە چاک کردی و کردی دڵداری

تا دوجار ڕوح و گیانم دراری

منیش وە عشقەو هاتمە پیریت

ناشتم تاقەتێ سەیرێ دڵگیریت

خوەم ڕەها کردم لە بەندێ زندان

تا دوجار بووەم لەزەتێ گیان دان

بنووش پەی دەرپەی لەی شەراوێ گیان

تا تەعبیراو بوو خاوێ بەربەیان

.

وەحید کەماڵی

٢٢-٤-٢٠١٩

سلێمانیە